హైడ్రోథెరపీ మరింత బాగా నిద్రపోవడానికి ఎలా సహాయపడుతుంది?

నీటిలో వ్యాయామం చేయడం మీ కీళ్లకే కాదు, నిద్రకు కూడా మంచిదని మీకు తెలుసా? హైడ్రోథెరపీ వల్ల ఎన్నో ప్రయోజనాలు ఉన్నాయి, చరిత్ర అంతటా వాటిని గుర్తించి సాంప్రదాయ చికిత్సల్లో ఉపయోగించారు. మంచి ఆరోగ్యం కోసం స్నానశాలలు శతాబ్దాలుగా ఉన్నాయి. రోమన్ల నుండి రష్యన్ల వరకు, కండరాల బిగుతును తగ్గించుకోవడానికి, రక్త ప్రసరణను పెంచుకోవడానికి అందరూ ఏదో ఒక రూపంలో హైడ్రోథెరపీని ఆస్వాదిస్తూనే ఉన్నారు. 17వ శతాబ్దానికల్లా యూరప్‌లో స్నానశాలలు ఎంతో ప్రాచుర్యం పొందాయి, U.S.A లో మొదటి పబ్లిక్ స్నానశాల 1700ల మధ్యలో నిర్మించినట్టు చెబుతారు.

హైడ్రోథెరపీ లేదా “పూల్ థెరపీ” లేదా “బాల్నియోథెరపీ” అన్ని వయసుల వారికీ సరిపోతుంది, ఒత్తిడి హార్మోన్ల ఉత్పత్తిని నియంత్రిస్తూ, రోగనిరోధక వ్యవస్థను ఉత్తేజపరుస్తూ, మెరుగైన రక్త ప్రసరణతో శరీర నొప్పులను దూరం చేస్తూ శరీరాన్ని సమతుల్యంలో ఉంచుతుంది. నీటి స్పర్శకు లేదా వేడి, చల్లని ప్రేరణలకు గురైనప్పుడు మన శరీరాలు తమను తాము సర్దుబాటు చేసుకుని, కాలక్రమంలో బలంగా మారతాయి. మనసుకు, శరీరానికి విశ్రాంతి ఇవ్వడంలో హైడ్రోథెరపీని మించినది లేదు.

హైడ్రోథెరపీ నిరుత్సాహాన్ని దూరం చేస్తుందని కూడా తెలుసు, డిప్రెషన్ లక్షణాలకు తరచుగా దీన్ని సూచిస్తారు. ముఖ్యంగా చల్లని నీటికి గురికావడం సింపథెటిక్ నాడీ వ్యవస్థను ఉత్తేజపరిచి, మెదడుకు, శరీర కేంద్ర భాగానికి రక్త ప్రవాహాన్ని సులభతరం చేసి, రక్తంలో బీటా-ఎండార్ఫిన్ స్థాయిలను పెంచడం ద్వారా మనం సహజ సమతుల్య స్థితికి తిరిగి రావడానికి సహాయపడుతుంది. డిప్రెషన్‌తో బలమైన సంబంధం ఉన్న శరీరంలోని వాపును తగ్గించడానికి కూడా ఇది సహాయపడుతుంది. వ్యాయామానికి కూడా ఇలాంటి ప్రభావాలు ఉన్నాయని భావిస్తారు కాబట్టి నీటిలో వ్యాయామం చేయడం రెట్టింపు ఫలితాలను ఇస్తుంది.

ప్రైమేట్‌లుగా లక్షలాది సంవత్సరాల మన పరిణామ క్రమంలో మనం “శారీరక ఒత్తిడి కారకాలకు” (ఉష్ణోగ్రతలో నిరంతర మార్పులు లేదా కాసేపు చల్లని నీటిలో మునగడం వంటివి) లోనయ్యాం, అవి శరీరంలో, మెదడులో ఎన్నో ప్రయోజనకరమైన రసాయనాలను ఉత్పత్తి చేశాయి. ఈనాటి ఉష్ణోగ్రత నియంత్రిత, సుఖాలకు అలవాటుపడిన సమాజంలో శారీరక ఒత్తిడి కారకాలు పూర్తిగా లేనప్పుడు డిప్రెషన్ పాక్షికంగా మొదలవ్వవచ్చని ఎన్నో పరిశోధనా అధ్యయనాలు సూచిస్తున్నాయి

హైడ్రోథెరపీతో, మనకు తెలియకుండానే నిద్రకు అడ్డుపడుతున్న ఎన్నో శారీరక, మానసిక సమస్యలను మనం ఎదుర్కోవచ్చు. రక్తపోటులో అసమతుల్యత, ఆందోళన, తలనొప్పులు, నిరంతర అలసట, జీర్ణ సమస్యలు, ఏ రకమైన నొప్పులైనా మన నిద్ర నాణ్యతను దెబ్బతీయవచ్చు. వీటన్నిటికీ నీటి చికిత్సతో తగిన విధంగా చికిత్స చేయవచ్చు. ముఖ్యంగా నీటి ఒత్తిడి, ఉష్ణోగ్రతను సరిగ్గా సెట్ చేసినప్పుడే నిర్దిష్ట సమస్యలను ఎదుర్కోవడానికి సహాయపడతాయి.

యూరప్, ఆసియాలోని కొన్ని ప్రాంతాల్లో అతిథుల వైద్య చరిత్రను దృష్టిలో పెట్టుకుని రూపొందించిన స్పా ప్రోగ్రామ్‌లు ఉన్నాయి. వేర్వేరు ఉష్ణోగ్రతల స్నానాలతో, ఎన్నో రకాల హైడ్రోథెరపీ చికిత్సలతో, చాలా మంది వృద్ధ దంపతులు డాక్టర్ల చుట్టూ తిరగడం కంటే ఈ సహజ పునరుత్తేజ కేంద్రాల్లో చేరడానికే ఇష్టపడతారు. మా ఉత్తమ లేటెక్స్ ఫోమ్ మ్యాట్రెస్‌తో రాత్రి గాఢ నిద్రకు ఏదీ అడ్డు రాకుండా చూసుకోండి.